Cant 7
Cant 7
Cant 7.1
quid videbis in Sulamiten nisi choros castrorum quam pulchri sunt gressus tui in calciamentis filia principis iunctura feminum tuorum sicut monilia quae fabricata sunt manu artificis
Cant 7.2
umbilicus tuus crater tornatilis numquam indigens poculis venter tuus sicut acervus tritici vallatus liliis
Cant 7.3
duo ubera tua sicut duo hinuli gemelli capreae
Cant 7.4
collum tuum sicut turris eburnea oculi tui sicut piscinae in Esebon quae sunt in porta filiae multitudinis nasus tuus sicut turris Libani quae respicit contra Damascum
Cant 7.5
caput tuum ut Carmelus et comae capitis tui sicut purpura regis vincta canalibus
Cant 7.6
quam pulchra es et quam decora carissima in deliciis
Cant 7.7
statura tua adsimilata est palmae et ubera tua botris
Cant 7.8
dixi ascendam in palmam adprehendam fructus eius et erunt ubera tua sicut botri vineae et odor oris tui sicut malorum
Cant 7.9
guttur tuum sicut vinum optimum dignum dilecto meo ad potandum labiisque et dentibus illius ruminandum
Cant 7.10
ego dilecto meo et ad me conversio eius
Cant 7.11
veni dilecte mi egrediamur in agrum commoremur in villis
Cant 7.12
mane surgamus ad vineas videamus si floruit vinea si flores fructus parturiunt si floruerunt mala punica ibi dabo tibi ubera mea
Cant 7.13
mandragorae dederunt odorem in portis nostris omnia poma nova et vetera dilecte mi servavi tibi
