Sap 6
Sap 6
Sap 6.1
melior est sapientia quam vires et vir prudens magis quam fortis
Sap 6.2
audite ergo reges et intellegite discite iudices finium terrae
Sap 6.3
praebete aures vos qui continetis multitudines et placetis vobis in turbis nationum
Sap 6.4
quoniam data est a Domino potestas vobis et virtus ab Altissimo qui interrogabit opera vestra et cogitationes scrutabitur
Sap 6.5
quoniam cum essetis ministri regni illius non recte iudicastis neque custodistis legem iustitiae neque secundum voluntatem Dei ambulastis
Sap 6.6
horrende et cito apparebit vobis quoniam iudicium durissimum in his qui praesunt fiet
Sap 6.7
exiguo enim conceditur misericordia potentes autem potenter tormenta patientur
Sap 6.8
non enim subtrahet personam cuiusquam Dominus nec reverebitur magnitudinem cuiusquam quoniam pusillum et magnum ipse fecit et aequaliter cura est illi pro omnibus
Sap 6.9
fortioribus autem fortior instat cruciatio
Sap 6.10
ad vos ergo reges sunt hi sermones mei ut discatis sapientiam et non excidatis
Sap 6.11
qui enim custodierint iusta iuste iustificabuntur et qui didicerint ista invenient quid respondeant
Sap 6.12
concupiscite ergo sermones meos diligite illos et habebitis disciplinam
Sap 6.13
clara est et quae numquam marcescat sapientia et facile videtur ab his qui diligunt eam et invenietur ab his qui quaerunt illam
Sap 6.14
praeoccupat qui se concupiscunt ut illis se prior ostendat
Sap 6.15
qui de luce vigilaverit ad illam non laborabit adsidentem enim illam foribus suis inveniet
Sap 6.16
cogitare ergo de illa sensus est consummatus et qui vigilaverit propter illam cito erit securus
Sap 6.17
quoniam dignos se ipsa circuit quaerens et in viis ostendit se illis hilariter et in omni providentia occurrit illis
Sap 6.18
initium enim illius verissima est disciplinae concupiscentia
Sap 6.19
cura ergo disciplinae dilectio est et dilectio custoditio legum illius est custoditio autem legum consummatio incorruptionis est
Sap 6.20
incorruptio autem facit esse proximum Deo
Sap 6.21
concupiscentia itaque sapientiae deducet ad regnum perpetuum
Sap 6.22
si ergo delectamini sedibus et stemmatibus reges populi diligite sapientiam ut in perpetuum regnetis
Sap 6.23
Sap 6.24
quid est autem sapientia et quemadmodum facta sit referam et non abscondam a vobis sacramenta Dei sed ab initio nativitatis investigabo et ponam in lucem scientiam illius et non praeteribo veritatem
Sap 6.25
neque cum invidia tabescente iter habebo quoniam ista non erit particeps sapientiae
Sap 6.26
multitudo autem sapientium sanitas est orbis terrarum et rex sapiens populi stabilimentum est
Sap 6.27
ergo accipite disciplinam per sermones meos et proderit vobis
